लोहारा तालुक्यात आनंदाचा शिधा वाटपास प्रारंभ; २२ हजार २९३ कुटुंबांची दिवाळी होणार गोड
लोहारा (जि. धाराशिव): राज्य सरकारकडून दीपावली सणानिमित्त देण्यात येणाऱ्या ‘आनंदाचा शिधा’ वाटपाचा शुभारंभ तहसीलदार प्रसाद कुलकर्णी यांच्या हस्ते बुधवारी (ता. नऊ) करण्यात आला. सुमारे ७० रेशन दुकानातून तालुक्यातील २२ हजार २९३ शिधापत्रिकाधारकांना याचा लाभ मिळणार आहे. सार्वजनिक वितरण व्यवस्थेतंर्गत अंत्योदय अन्न योजनेतील चार हजार ७१ शिधापत्रिकाधारक, प्राधान्य कुटुंब योजनेतील १७ हजर ५८४ शिधापत्रिकाधारक तर ६३८ शेतकरी असे एकूण २२ हजार २९३ लाभारार्थी कुटुंबांना दीपावली सणानिमित्त एक किलो साखर, एक लिटर तेल, प्रत्येकी अर्धा किलो परिमाणात रवा, हरभराडाळ, मैदा व पोहे असे सहा वस्तूंचा समाविष्ट असलेला ‘आनंदाचा शिधा’ हा संच शंभर रूपये दरात रेशन दुकानातून ई-पॉस प्रणालीद्वारे वितरित करण्यात येत आहे. प्रति शिधापत्रिका एक असे या संचाचे वाटप केले जात आहे. आनंदाचा शिधा वाटपाचा शुभारंभ शहरातील इन्नूस पटेल यांच्या रेशन दुकानात तहसीलदार प्रसाद कुलकर्णी यांच्या हस्ते करण्यात आला. यावेळी प्रभारी नायब तहसीलदार महादेव जाधव, स्वस्त धान्य दुकानदार इन्नूस पटेल, निशिकांत गोरे, अतुल कांबळे, राजू जट्टे, विश्वनाथ जट्टे, गणपत रेणके, अरुणा महानुर, संजीवनी बुरले, कुलसूम शेख, मेघा माळवदकर यांच्यासह शिधापत्रिकाधारक उपस्थित होते. यावेळी तालुक्यातील संबंधित शिधापत्रिकाधारकांनी लवकर आनंदाचा शिधा घेऊन जावे, असे आवाहन तहसील प्रशासन व रेशन दुकानदारांनी केले आहे.
