धनगर समाजाचा एसटी प्रवर्गात समावेश करून अंमलबजावणी करा: तहसीलदार यांना दिले निवेदन

लोहारा (जि. धाराशिव): धनगर समाजाचा एसटी प्रवर्गात समावेश करून त्याची तत्काळ अंमलबजावणी करावी, अशी मागणी सकल धनगर समाजाने तहसीलदार यांच्याकडे सोमवारी (ता. २२) निवेदनाद्वारे केली आहे. दिलेल्या निवेदनात म्हटले आहे की, सत्तेत असलेल्या सरकारने गेली ७५ वर्षांपासून धनगर समाजाला एसटी प्रवर्गाच्या आरक्षणापासून वंचित ठेवून समाजाचे भरून न निघणारे नुकसान केले आहे. डॉ. बाबासाहेब आंबेडकरांनी संविधानात धनगर समाजाला एसटीचे प्रवर्गाचे आरक्षण दिलेले आहे. सध्या महाराष्ट्रात एसटी प्रवर्ग आरक्षणांसाठी धनगर समाजाच्या वतीने धाराशिव, पंढरपूर, लातूर व पुणे या शहरासह राज्यभर आंदोलन सुरू आहे. आरक्षणाचा प्रश्न सुटत नसल्यामुळे धनगर समाजातील तरूण वर्ग आत्महत्यासारखा टोकाचा निर्णय घेत आहेत. दोन दिवसापूर्वी पंढरपूरच्या अंदोलनस्थळी समाजातील एका युवक कार्यकर्त्याने विषारी औषध घेवून आत्महात्या करण्याचा प्रयत्न केला. तसेच धाराशिव जिल्ह्यात जल समाधी आंदोलन करण्यात आले अशी बरेच अंदोलने केली जात असताना राज्य सरकार कोणत्याही अंदोलानाची दखल घेत नाही. ही दुर्दैवीबाब असल्याचे नमूद करून मुख्यमंत्री एकनाथ शंदे यांनी  घटनेत दिलेल्या आरक्षणाची तात्काळ अंमलबजावणी करून धनगर समाजाला एसटी प्रवर्गाचे प्रमाणपत्र द्यावे, या मागणीचे निवेदन  तहसीलदार काशीनाथ पाटील यांना देण्यात आले. डॉ. हेमंत श्रीगिरे, डॉ. गुणवंत वाघमोडे, अॅड. दादासाहेब जाणकर, अॅड. संध्याराणी भुसणे, माजी उपनगराध्यक्ष प्रताप घोडके, दत्तात्रय गाडेकर, वैजनाथ कागे, प्रशांत थोरात, रघुवीर घोडके, जयसिंग बंडगर, वैभव गडदे, दत्तात्रय वाघमारे, अमित विरोधे, उमेश देवकर, चंद्रकांत बनसोडे, बसवराज पाटील, मारूती बंडगर, बलभीम विरोधे, प्रभाकर मदने, व्यंकट घोडके,  बळिराम भंडारे यांच्या निवेदनावर स्वाक्षऱ्या आहेत.