मुरूम (जि. धाराशिव): मुरूम शहरातील अशोक चौक, किसान चौक महादेव मंदिरात महाशिवरात्रीनिमित्त शुक्रवारी सकाळी शिवलिंगावर विधिवत अभिषेक, बेल अर्पण करून पूजन करण्यात आली. सकाळपासूनच दर्शनासाठी भाविकांनी गर्दी केली होती. किसान चौकातील श्री महादेव मंदिरातील जोडलिंगेश्वराचे दर्शनासाठी भाविकांची गर्दी होती. अनेक वर्षांपासूनचे हे जुने मंदिर आहे. जुन्या काळात झालेले दगडी बांधकाम, लेणी काम, विविध दगडी मुर्त्या, या मंदिर परिसरात पहायला मिळते. विशेष म्हणजे काशीनंतर धाराशिव जिल्ह्यातील जोडलिंगेश्वर असलेले हे एकमेव मंदिर असल्याचे पूर्वजा पासून वारंवार चर्चा होत असते. येथील नागरिकांनी पुढाकार घेऊन अडगळीत पडलेल्या मंदिराचे महत्व व त्याची माहिती संकलित करीत आहेत. मंदिर परिसरात नुकतेच अनेक कामे झाले असून मंदिराला उजाळा देण्याचा प्रयत्न येथील नागरिक करीत आहेत. शुक्रवार (दि. ८) रोजी महाशिवरात्री निमित्त जोडलिंगेश्वर लिंगावर विधिवत अभिषेक करण्यात आले. भाविकांना प्रसादाचे वाटप करण्यात आले. शहरातून विविध भागांतील नागरिकांनी या मंदिरातील जोडलिंगेश्वराचे दर्शन घेतले.
